[ad_1]
🛑 السيد عبد الفتاح البرهان ، ماهو حقو نكون واضحين ، لما مشيت استلمت السلطة و ( انقلبت) على البشير وقابلتو في صلاة الصبح وقلتا لي نحن حنتسلم منكم السلطة ، لازم نتذكر انو قاليك : على بركة الله ، وابقو عشرة على البلد وعلى الشريعة ! إنت يا شيخنا طلعت ميتين أم البلد ، لا بقيت عليها عشرة ، ولا حافظت على الشعب ولا على الشريعة .. خلينا من دا ، حسابو مع ربّك قدام .. لكن البشير سلّمك البلد دي الدعم السريع من 18 – 20 ألف وكانوا خارج الخرطوم في دارفور ، وفوقهم الجيش قريب 250 ألف ، وهيئة العمليات الجهاز حوالي 16 ألف والاحتياطي المركزي فوق 10 الف ، إنت العلمتو يا شيخنا لا يغتفر ، إنت لعبت بإعدادات البلد ، أضعفت الجهاز وقللت صلاحياتو ، حليت هيئة العمليات وواجهتهم بالرصاص وسرحتهم بدون حقوق نهاية خدمة ، وأضعفت جهاز الشرطة وقوات الاحتياطي ، سلمتا البلد للقحاطة والسفراء والمخابرات الاقليمية والدولية يسرحوا فيها ، ياخي إلى سقوط البشير ماكان في سفير يخش الحمام يبول إلى تكون الدولة عارفة ، ياخي انت لو مسكوك نادي الامل عطبرة ما بتجوطو الجوطة دي …
حميدتي ده كان بجي الخرطوم بقعد 3 اسابيع عشان يقابل الرئيس ، كان خاضع مطأطئ راسو زي الأرنب كل سلاحو وعرباتو وذخيرتو وعتادو محسوب بي الطلقة والعدد .. حميدتي كان لما يتحرك في مهمة عسكرية الجيش بديهو السلاح البكفيه المهمة دي فقط والباقي برجعو نهاية العملية… ده شنو العلمتو ده يا سيّد ؟! تلغي المادة الخامسة ( تبعية الدعم السريع لقانون القوات المسلحة) وتسمح ليهو بحرية التجنيد والتسليح والعمل الاقتصادي والامني والاستخباري وعلاقات خارجية وسفريات مفتوحة ، قواته في 4 سنوات من 20 الف مقاتل حصلت 120 الف مقاتل ، في عهدك وعشان خاطر حميدتي وبتوجيهات من الخليج ومصر قمت بإقالة وابعاد عدد كبيرة من ضباط الجيش والجهاز والشرطة وجبت كل الكوادر اللي حميدتي قاليك تجيبها ، انا ماعارف يا البرهان انت والمعاك مختلفين شنو عن قحت .. يعني حاجة واحدة كدا اقول والله هم أسوأ او انتو احسن مافي …
انت عارف انت بسببك ، بسببك يا عبد الفتاح البرهان والمعاك كلهم ، في بنات سودانيات بنات أسر مختطفات من اهلهن وبيوتهن ودوهن دارفور الان مشغلنهن ايجار بالساعه .. انت فاهم انو بسببك قرية واحدة فقدت اكتر من 250 شهيد في يوم واحد ، انت عارف مدينة زي الهلالية فقط فقدت اكتر من 1000 شهيد ، انت عارف محلية زي النهود فقدت اكثر من 600 شهيد .. ده غير باقي قرى الجزيرة وسنار والخرطوم وبحر ابيض وشمال كردفان ودارحمر وشرق النيل ودارفور.. ماهو احنا ما لعبة مش ؟ احنا وشعوبنا واهلنا وقبائلنا وأسرنا ما (بلاي استيشن) ولا call of duty مش ؟ احنا دماءنا واموالنا واعراضنا دي ما بنشتريها من السوق ولا بنعبيها رصيد من بنكك ..! البلد دي لو مكتوبة باسمك ومربوطة في طرف قاشك وملصقة في حبال بووتك كلمنا ، بنسكت ، لكن والله يا البرهان انت والمعاك أنا خصيمكم يوم القيامة ، والله في كل صلاة أدعي عليكم انتو والجنجويد وكل زول فيكم طان بتلاعب بالبلد وبالشعب ده طوال السنوات دي .. والله إنا قد رفعنا أكفّنا الى الله واللهُ لا يردّ مظلوماً .. نسأل الله أن يرينا فيكم وفي الجنجويد ما فعلمتموه وتسببتم فيه !
رحم الله شهداء أمتنا وشعوبنا وقبائنا ، رحم الله شهداء الجيش والمستنفرين والقوات المساندة ..💔
[ad_2]
Source
