[ad_1]
في رده على تدوينة أمين حسن عمر
#هشام_ود_قلبا يكتب..
يا أمين الضلال أعتبرنا صدقناك وفي الانتخابات الجايه – ده لو جات – صوتنا للمؤتمر الوثني وللحركة المتأسلمة ، وفزتوا في الانتخابات وحكمتوا البلد .. وطبعاً (إنتخابات) دي يعني مناخ ديمقراطي وحرية وعدالة وسلام ومساواة وكده .. أها من واقع الجو الديمقراطي الجميل الجابكم ده جاوبني :
– هل حتقدروا تحكموا بدون ما تدقدوا مسمار في راس مواطن لأنه قال حكمكم غلط وما عاجبو ؟؟
– هل حتقدروا تحكموا في جو ديمقراطي ، نقابات واتحادات وكيانات منتخبة ، بتمارس حقها في التظاهر والإضراب وغيره لتحقيق المطالب ؟؟
– هل حتقدروا تحكموا بدون معتقلات وبيوت أشباح واختطاف وتعذيب واغتصاب وقتل ودفن في مقابر جماعية مخفية الاماكن ؟؟
– هل حتقدروا تحكموا بدون جهاز أمن وهيئة استخبارات عسكرية مشتحين لأجهزة ومخابرات العالم كله ، ومتخصصين بس في إرهاب وقمع المواطن ؟؟
– هل حتقدروا تحكموا بوجود مجلس تشريعي منتخب ديمقراطي يراقب حكمكم ويمرق كل بلاويكم المؤكد حتعملوها ، ويعمل القوانين ويراقب تنفيذها ويحاسبكم بيها ، مجلس تشريعي ما يكون فيه استباحة لدم المواطن shot to kill ، ولا هدر لثرواته (حنطبع القروش رب رب رب) ، ولا تهديد (أدونا اسبوع والبمد راسه بنقطعه ليه) ؟؟
– هل حتقدروا تحكموا في ظل وجود صحافة حرة ، ما بتخضع للرقابة قبل النشر والمصادرة بعد الطبع ، صحافة نزيهة ما بعتقلوا كتابها ، وما فيها البشتروهم ولا البشتغلوا بأشعارات بنكك ؟؟
– هل حتقدروا تحكموا بدون ما تقتلوا الطلاب وتحاصروا الجامعات وتختطفوا الاساتذة وتقمعوا أي نشاط ما يتوافق مع هوى أنفسكم ؟؟
– هل حتقدروا تحكموا بدون ما تشردوا الكفاءات وتعينوا هوامل وفاقد تربوي المتأسلمين ؟؟ وود خالة فلان من وظيفة عامل بوفيه يترقى شوية شوية لحدي ما يبقى وكيل الوزارة ؟؟
– هل حتقدروا تحكموا بدون ما أقل متأسلم في قياداتكم يلغف أراضي مساحتها تفوق مجموع مساحة البحرين وجيبوتي وتونس ؟؟
– هل حتقدروا تحكموا بدون ما ولد وزيرة العدل يقبضوه بوزع مخدرات بعربية الوزارة وبنزين الحكومة ، وأمه تجي تطلق سراحه من القسم ، ويعاقبوا العساكر القبضوه ؟؟
– هل حتقدروا تحكموا بدون ما شرطة الشغب تطلق الرصاص الحي وعساكر الاحتياطي المركزي يطاردوا المتظاهرين السلميين بالسواطير والسكاكين ؟؟
– هل حتقدروا تحكموا بدون ما زوج بنت الوزير يلغف قروش عقد تشييد مباني للوزارة ، ولما المبنى ينهار الوزير وزوج بنته مافي زول يسألهم ، وكمان الوزير يرقوه لوزارة أرفع ؟؟
– هل حتقدروا تحكموا بدون ما اولادكم ومهاويسكم يدرسوا على حساب الشعب وينجحوا ويتخرجوا بدون امتحانات بمسمى “دباب” و “مجاهد” …الخ ؟؟
– هل حتقدروا تحكموا والكل يكونوا سواسية أمام القانون ، بما فيهم قياداتكم البقبضوهم في الشقق المفروشة عز رمضان وصلاة التراويح شغالة برقصوا سكارى وسط المومسات ؟؟
– هل حتقدروا تحكموا بدون ما تحللوا الربا وتتنافسوا في منو اليلغف أكتر من أموال القروض المشحودة بأسم الشعب ؟؟
– هل حتقدروا تحكموا بدون ما مسؤلينكم المتأسلمين يقولوا جملتهم الشهيرة في أي مال عام (حقنا كم) ؟؟
– هل حتقدروا تحكموا بدون ما تعينوا في السفارات حول العالم شفعكم الشواذ الشاذين ، وكل يوم فضائح يا إما تحرش في وسائل النقل العامة أو محاولة اغتصاب في بار ؟؟
– هل حتقدروا تحكموا بدون ما تفرتقوا الفضل من المشاريع القومية وتبيعوها حديد خردة بالطن ، ويتصدر الحديد للخارج بأسماء منظماتكم المتأسلمة ؟؟
– هل حتقدروا تحكموا بدون ما تحاكموا شاب أو شابه بتهمة التخريب وتهديد السلم عام ، والأدلة ترديده/ها للنشيد الوطني في الشارع العام والمعروضات علم السودان ؟؟
– هل حتقدروا تحكموا بدون ما تبيعوا البلد للاستخبارات الاجنبية يعملوا قواعدهم البحرية ، ورئيسكم يستلم من الاجانب “غمتتو” الشهرية ملايين الدولارات كااااش ؟؟
– هل حتقدروا تحكموا بدون ما تنهبوا ثروات البلد وإنت تسرق كهرباء الجامع ومافي زول يحاسبك ؟؟
وسؤال أخير ..
نفرض إنه الشعب قرر يجيبكم عبر الانتخابات والديمقراطية ويستحملكم تاني ، إنتو حتقدروا تستحملوا الديمقراطية ؟؟؟
#كيزان_مسوخ
[ad_2]
Source
