[ad_1]
⚫ نحو خطاب ( إعلامي جديد ومواكب )
🛑 رسالة لمة يهمهم الأمر
◼️ عدونا واحد هو ( الكوز ) ..
◼️ عدونا واحد هو ( قوى الإستبداد ) البتحاول تفرض ( رؤية أُحادية خاصّة بمجموعة محدّدة ) على كل ( السودانيين بمختلف تنوعُّهم وتعدّدهم ) بقوة السلاح ..
◼️نحنا هنا متواجدين في مواقع ( تواصل إجتماعي ) ما متواجدين ( داخل ميادين المعارك ) ..
◼️ هنا في أسلحة ( مشاركة وإعجاب وتعليق وشير
وتكبيس ) ..
◼️هنا مافي ( بل وفتك ومتك ) بالأسلحة الخفيفة والتقيلة .
◼️ هنا في ( فتك ومتك وبل ) بالحجّة والمنطق ..
◼️ هنا الإنتصار ما مرتبط ( بالمتحركات العسكرية ) ..
◼️ هنا الإنتصار مرتبط بالقدرة على الإقناع ..
◼️ إذن كل وسائلنا هنا ( سلمية ) ..
◼️ والما سلمي بكون مضطر يستخدم الأدوات السلمية .
◼️ والعسكري بكون مضطر يستخدم الأدوات المدنية ..
مافي حاجة هنا بتجيب الموت والإنتهاكات والدمار والخراب والنزوح واللجوء والتشريد والتجويع ..
◼️ مع الإعتراف بأن ( الكلمة سيفك ) ..
◼️ و ( لسانك حصانك ) ..
◼️ وإن كنت دبلوماسي سستطيع أن تقطع رقبة خصمك بدون استخدام السكين .
◼️ هنا في حماية ذاتية للذات والأعراض والحقوق الشخصية
◼️ هنا في ( نفي ) في ( ترحيل ) ..
◼️ في ( ياخ ما داير معاك ومعاك سلامة )
◼️ هنا في ( كتم ) في ( حظر ) في إلغاء صداقة ومتابعة )..
◼️ خيارات كلها بتستخدمها بحريتك متى ما ( شعرت بالضيق والنكد ) ..
◼️ ( عدونا الهنا ) ياهو نفس ( عدونا الفي الواقع ) ..
◼️ يبقى واجب علينا ( نتوحّد ضدو ) ..
◼️ نتوحّد ضدو في ( صوت إعلامي واحد ) ..
◼️ صوتنا الموحّد ده يشمل ( الشايل سلاح ) و ( الشايل كلمة ) ..
◼️ طالما جيت ( المنصات دي ) وعملت ( صفحة ) معناها ( ختيت السلاح ) و اخترت خيار إنك تشيل ( حروف ) أو ( كلمة ) ..
◼️ جيت ( لملعب الفضاء المدني السلمي ) ..
◼️ واجب عليك تلم ( حرفك وكلمتك ) مع أي ( زول متلاقي معاك في نفس الأهداف والغايات المشتركة ) ..
◼️ سبب واحد يخليك تخلي ( فراغ ) يملاهو ( الكوز ) مافي ..
◼️ المساحات بينا لازم تتملي ..
◼️ صفوف الصفحات تقيف بإنتظام ..
◼️ كتف صفحتك مع كتف صفحتي ..
◼️ ما نخلِّي فراغ بينا عشان الطبيعة لا تؤمن بالفراغ ..
◼️ نملأ جميع الفراغات بتركيزنا في ( الحاجات البتجمعنا ) ..
◼️ بمعرفتنا ( لمصيرنا المشترك )..
◼️ بحمايتنا ( لمطالبنا وأهدافنا )..
◼️ أي زول يشوف هو عاوز ( يهزم العدو ده بشنو ) في ( الواقع ) ..
◼️ ويختار ( الوسيلة ) و ( الطريقة ) التعجبو ..
◼️ شريطة إنو الوسيلة دي ما يكون فيها ( ضرر للوطن والمواطن ) ..
◼️ المهم : في الواقع من ( أحب شي أتقنه ) ..
◼️ أما هنا ( في وسائل محدَّدة ) تجاه ( هزيمة العدو ) واجب علينا كلنا ( لازم نلترم بيها ) ..
◼️ ( عدوك وعدوي وعدونا الكوز ) : سبب واحد يخلِّيك تهزم ( صفّنا ) و ( وحدتنا ) بنقاشات ( تسعدو وتفرحو ) مافي ..
◼️ سبب واحد يخلِّيك تركز مع ( زول ما كوز ) و لا ( بيخدم خط الكيزان ) مافي ..
◼️ سبب واحد يخلّي واحد فينا يدير معارك جانبية تهزم صفنا مافي ..
◼️ سبب واحد يخلّي واحد فينا يساهم في تكسير ( معسكر السلام ) لصالح ( معسكر الحرب ) مافي .
◼️ معنى الكلام ده ما إنك تعاين في زول بيخدم في خط الكيزان وتسكت ..
◼️ لابد من ( التعرية ) و ( إزالة الأقنعة ) عشان ( الصفوف تتمايز ) ..
والمواقف ( الضبابية ) و ( الرمادية ) تتشال ..
◼️ ومقترض ده يكون( خطّنا كلنا ) .
◼️ أي ( زول مؤمن بوقف الحرب وعاوزها تكون آخر حروب السودان ) مفترض يكون : ( زولك وزولي ) .
◼️ أي ( زول مؤمن باستعادة مسار الإنتقال الديمقراطي ) مفترض يكون : ( زولك وزولي ) ..
◼️ أي ( زول مؤمن بإستكمال مهام الثورة ) مفترض يكون : ( زولك وزولي ) ..
◼️ يكون زولك وزولي بغض النظر عن هو ( جذري ) أو ( صمودي ) أو ( تأسيسي ) أو ( صاحب رؤية و موقف خاص ) .
◼️ نتجاوز الحاجات الصغيرة ( البتفرِّقنا ) ..
◼️ ونركِّز في الحاجات الكبيرة ( البتجمعنا ) ..
◼️ في النهاية الحرب دي مهما استمرّت حا تنتهي ( بحل سياسي سلمي تفاوضي ) ..
◼️ يبقى واجب علينا من الآن نجتمع في المطالب والأهداف البتخلينا بعدين ( ننتصر على الموجود معانا في الطاولة ) ..
◼️ وعشان ننتصر محتاجين ( لحل سياسي شامل ) ..
◼️ والحل السياسي الشامل ما بيطلع إلا من ( وحدتنا مع بعض ) و من ( نقطة إتفاقنا مع بعض ) ..
◼️ وعشان نتفق ونتوحّد في ( رؤية حل سياسي شامل ) لازم ننتفق من هسه ( في صوت إعلامي واحد ) ..
◼️ والصوت الإعلامي ده هو في الحقيقة ( صوت العهد الجديد ) و ( النادي السياسي الجديد ) البطلع من ( مطالب وأهداف وأخلاق ومبادئ وأفكار ومفاهيم ثورة ديسمبر المجيدة ) ..
◼️ علّمتنا دروس التاريخ السياسي والثوري السوداني
إن قوتنا الحقيقية في وحدتنا ..
◼️ وأن عدونا دائماً ( بيسود ويتمدّد وينتشر ) لما يقدر ( يفرّقنا من بعض ) ..
🛑 وياريت ده يكون خطاب المرحلة ( الملزم لينا كلّنا ) لو فعلاً نحنا عندنا موقف مبدئي من ( الكيزان ) و من أي ( فرد ) أو ( جماعة ) بتقدّم ( فعل ) يصب في ( صالح تنفيذ أجندة الكيزان ) .
الشريف الحامدابي
الثلاثاء
29 يوليو 2025م
#المرياع_ماينوم
#لإقتلاع
#إرادة_الحركة_الجماهيرية_هي_الحل🇸🇩✌🏻
[ad_2]
Source
