♦️ بدل تجتهدوا في إنكم ترجِّعوا الناس عشان تتأقلم مع الحرب ، وترجِّعوهم للموت والإنتهاكات والدمار والخراب والتجويع والتشريد ، من الأفضل إنكم تجتهدوا مع الساعين لوقف الحرب عشان ترجِّعوهم للأمن والأمان والإستقرار الحقيقي والحياة الكريمة ..
♦️ بنقول ليكم وباستمرار وبتكرار : الحرب دي طالما إنها مستمرة معناها لا في أمن لا أمان لا استقرار لا حياة كريمة ..
♦️ اعلانكم عن إنو الحياة آمنة في منطقةٍ ما بالكذب وبتدعوا الناس للعودة ده يعتبر ( إحداثيات ) للطرف الآخر عشان ينسف الأمن القليل الموجود .
♦️ وسيظل المواطن المتواجد في مكان سيطرة ( حكومة أمل ) مع استمرارية الحرب وعلى الدوام عُرضة ( لمسيرات الدعمم السريع ) ..!
والمواطن المتواجد في مكان سيطرة ( حكومة تأسيس )
عُرضة ( لطيران الجيش ) ..
♦️ وكل طرف ماحا يخلِّي الطرف الآخر ( يشعر بالأمان ) ولا حا يخلِّيهو يمارس ( حياتو بشكل طبيعي ) والبيدفع التمن : المواطن .
♦️ وانت كمواطن عادي متضرّر من الطرفين ما تساهم في ( عودة الناس ) عشان يكونوا عُرضة للموت ، ولا تكون ممتلكاتهم العامة والخاصة عُرضة للدمار والخراب .. خاصةً وإنو قرار توفير الأمن والأمان والحياة الكريمة في ظل استمرارية الحرب ما من صميم عملك وإختصاصك ولا تحت سيطرتك ..
♦️ انت كمواطن المفترض يكون همّك الأساسي مُنصب تجاه وقف الحرب . وتجاه وجود الضمانات البتخلِّيك ترجع لبيتك ومنطقتك وانت في كامل الشعور بالأمن والأمان ..
♦️ انت خارج السودان وشاعر بإنك في مكان آمن ومستقر ما تبقى أناني وتطالب باستمرارية الحرب ، اتذكّر في نفس اللحظة الإنت بتقرأ فيها البوست ده في مواطن سوداني زيّك بيعاني في ( معتقلات الطرفين ) .. في مواطن زيّك بيعاني من انعدام ( الغذاء والدواء والمأوى ) …في مواطن زيّك بيعاني من ( المحاكمات الجائرة والمجحفة والظالمة ) ..في مواطن ( مستهدف ومطارد ) .. أبسط واجب مفروض عليك إنك تقول : لازم الحرب دي تقيف عشان يتمتع زيّك بالأمن والأمان والإستقرار والحياة الكريمة .
♦️ إنت قاعد في مكان آمن داخل السودان ما تفتكر نفسك ما بتعاني من استمرارية الحرب ، الحرب موجودة معاك في شكل حرمانك من ممارسة حياتك بشكل طبيعي ، معاك في الإستهداف والظلم البتتعرَّض ليهو ، معاك في شكل حرمانك من حرية والتعبير والحركة والتنقُّل .. معاك في شكل الإستهداف والقمع والكبت البتتعرّض ليهو .. معاك في شكل حرمانك من أبسط حقوقك كمواطن عندو صوت وحلم وأمل .. معاك في الحصار والتضييق المفروض عليك .. معاك في غلاء الأسعار ، وفي انعدام السلع الضرورية ، معاك في معاناتك من انعدام الأمن الغذائي الحاد ، وفي تفشِّي الأمراض والأوبئة ..
♦️ مفترض مع بعض نعرف الحل النهائي لجميع مشاكلنا يبدأ من وقف العدائيات الى أن يصل بينا لسلام شامل وكامل وعادل ومستدام ..
♦️ ونعرف الما داير الحرب تقيف ده ياهو البستثمر في موتنا وانتهاكاتنا ودمارنا وخرابنا وتجويعنا وتشريدنا ، وده مع الحرب وأضرارها وآثارها في مرتبة واحدة ويسقط بس .
#المرياع_ماينوم
#لإقتلاع
#إرادة_الحركة_الجماهيرية_هي_الحل🇸🇩✌🏻
Source
