[ad_1]
كتب #مهادن_الزعيم : (اي تشابه بين السيناريو ادناه والواقع انا غير مسؤول عنه والصورة لي لفت الانتباه فقط)
الحصل شنو ي سيادتك وكفارة ليك ان شاء الله احكي لينا الحصل بالتفصيل …؟
شوف انا كنت قاعد في مكتبي في بورتسودان زهجان وقاطع موضوع وماعارف امشي ازور ياتو حتة اها الكاهن جاء ماري شافني ف حن في حالي وقال لي (انا ماشي قطر كم يوم وجاي … انت لو زهجان سوق معاك اتنين تلاتة من ناسنا وامشوا السعودية تغيرو جو تحت شعار تطوير العلاقات الازلية بين البلدين) وانا طوالي قلتا والله فكرة على الاقل الواحد يصلي ليهو ركعتين في الروضة الشريفة … اها لمن جينا للمشي السوخوي قال انا اول زول ماشي لاني اتعودتا علي عيشة برة وعايز اطلع اشم نفس بدل كتمة البورت دي وطبعا اخوانا ديلك نطو وقالو عودنا راكب في الزيارة كأستحقاق سلام ولا نعمل (كرو كالي) …
اها لميت الجماعة وركبنا الطيارة ومشينا على السعودية واتصلنا عليهم لمن قربنا منهم قلنا ليهم نحن ماشين عليكم عشان يجهزو حالهم وكدا لانو الظروف م معروفة اها لمن وصلنا لقيت في استقبالنا وكيل امارة المدينة المنورة لانو باقي الناس مشغولين (وكيل امارة المدينة المنورة ذي نائب والي ولاية كسلا عندنا) قلنا خير يمكن الجماعة مضيوفين وكدا ….
مرا اليوم الاول ولا زول عبرنا مافي لكن يشهد الله الطقة نضيفة والسكن راقي عشان م نظلم الناس ساي … اها وقت مافي زول زارنا السوخوي قال لي (ارح غبيرة والله السودانيين هناك كتاااار وح يتلموا حوليك اكتر من اي افرو ونخاطبهم انا وانت طوالي عن حرب الكرامة والسيادة الوطنية والمؤامرة الكونية على جيشنا العظيم) لكن انا رفضتا عشان برستيجي وكدا لانو لو صادف وجودي هناك كشة ضد تجار الصعوط والعملة بكون موقفي محرج ف قلتا ليهم (نمشي الحرم المدني ونصلي في مسجد الرسول) فكان ردهم (امشي براك نحن ماشين باب شريف نشتري لينا هدوم لانها هناك رخيصة) اها مشيت براي ولمن وصلتا البوابة لقيت الضابط المسؤول من حرس المسجد مافي لكن النائب بتاعو موجود وبارك الله فيهو لمن عرف انا رئيس دولة جرى نادى لي المسؤول من المسجد ولفوا معانا جوة المسجد وبعدها رجعتا السكن …
اها بالصدفة لقيتلك فيديو لرئيس وزراء باكستان جاي زيارة للسعودية وعليك امان الله طيارتو في الجو طلعنلها تلاتة طيارات عسكرية ملكية عشان يحرسنها وهاك يالاهتمام … هنا انا نفسيتي اتأثرت شديد لمن ودوني المستشفى لاني كنت عايز شوية إهتمام م اكتر …
اها بعد مشيت المستشفى وجيت جاني وزيرة الخارجية بارك الله فيهو واتحمدل لي بالسلامة وقال لي كانو مضيوفين وانا قبلتا عذره … دي كل القصة لكن م تستبعد انو القحاطة العملاء يكونو هم القالو ليهم يهتمو بي الباكستاني ويهمشوني انا وبل بس … عجبي
الله غالب
[ad_2]
Source
