[ad_1]
🛑 الشريف الحامدابي :
◼️ نعم
🛑 عندي موضوع بخصوصك عاوز أقولو
◼️ اتفضّّل طوالي
🛑 في سياسيين من أبناء جيلك الآن قادة في الأجسام المختلفة .
_ وانت للآن شغال لايفات وما بتجي في التلفزيونات
_ و لغتك ما زي لغتهم
_ وبتقول مرات أي كلام وبتنزل لأي مستوى
_ دي ما طريقة زول عاوز يكون عندو مستقبل سياسي . _ ثم انت بطريقة هجومك دي بتزيد مساحة الأعداء والخصوم ما تقول للزول ( …..) كده في ( عينو ) .
الكلام ده ما بشبهك خاصةً وانت ( أستاذ ) .
_ ورِّيني رأيك وفسلفتك في الحاجة دي شنو ؟
◼️ شاكر للسؤال
_ وكويس إنك أديتني فرصة عبر سؤالك ده عشان أوضح موقفي بشكل واضح وصريح ليك ولكل الناس :
♦️ 1/ في حاجة اسمها ( متحدثين رسميين ) ، وديل هم الناطقين الرسميين باسم ( الأجسام المختلفة ) ، زي الناطق الرسمي باسم ( الحزب الفلاني ) ، الناطق الرسمي باسم ( التحالف لفلاني ) .
♦️ 2/ الناطقين الرسميين ديل بيمثلوا الأجسام البتحدثوا باسمها في أي مكان ، وكلامهم بعبّر عن أي زول منتمي للأجسام دي ، فما فيهم زول بقول رأيو الشخصي ، والمتلقين بياخدوا كلامهم ده كرأي رسمي للأجسام البنتموا ليها .
♦️ 3/ أنا الشريف ده واحد من الناس الموجودين داخل ( حزب ) وعندي ناطق رسمي بمثلني . وموجود داخل ( تحالف ) وعندي ناطق رسمي بمثلني وعندي ناس بتم إستضافتهم كممثلين للأجسام دي في كل وسائل الإعلام المختلفة .
♦️ 4/ من خلال ( رؤية تحالف صمود ) لوقف وانهاء الحرب ، قالت انها عاوزة تتواصل مع ( طرفي الحرب ) وإنها عاوزة تتواصل مع ( المجتمع الإقليمي والدولي ) فمعنى الكلام ده بإنو خطابها لازم يكون ( حكيم ) تجاه الأطراف دي كلها ، عشان تقدر تسوّق لرؤيتها .
♦️5/ أها النفترض في طرف من ( أطراف الحرب هاجم صمود ) بعبارة ( زعطوكم ) وكان ( رجال تعالوا السودان ) و يا ( عملاء و يا خونة ) أها يقوموا الناطقيين الرسميين البمثلونا طوالي يقولوا ليهم : ( مزعوطين انتوا ) و ( عملاء انتوا ) و ( خونة انتوا ) ؟
لو عملوا كده بكونوا ( فقدوا السيطرة على حكمتهم في التسويق لرؤيتهم ) واتحوّل التواصل من تواصل لإنتصار ( الرؤى ) إلى خطاب ( حشد وتعبئة ) ..
♦️ 6/ على سبيل المثال تاني : غرفة البلابسة شغالة ( شيطنة وتخوين ) و ( نبذ واساءة وسب وتجريح ) أها طوالي يقوم الناطق الرسمي حقنا أو المتحدث باسم تحالفنا بمواجهة غرف البلابسة دي ويتصدى ليها ؟ يرد عليهم واحد واحد ويفنّد كلام الفاقد التربوي والساقطين ديل وينسى التركيز مع ( القادة ) ؟
كده حا يكون أضاف لنفسو عبئ جديد ، إضافة لعبئ العمل ( السياسي والدبلوماسي ) عبئ ( هزيمة غرف البلابسة ) ..
🛑 أها الحل شنو ؟
◼️ الحل لازم يكون في ( متحدثين غير رسميين ) .. _ متحدثين مهمتهم الأساسية ( التصدِّي للهجوم والشيطنة والتخوين والنبذ والإساءة والسب والتجريح ) ..
_ متحدثين ما يقدر طرف من الأطراف يقول رأيهم ده رأي رسمي بيعبّّر عن ( الحزب ) أو ( التحالف ) ..
◼️ بالطريقة دي بكون في ( خطابين ) كل خطاب ( حا يواجه خطاب آخر ) بشكل مستمر وصولاً للهدف الأساسي والغاية المشتركة ( تكسير معسكر الحرب لصالح معسكر السلام ) ..
◼️ الخطاب ده بيكمِّل دور المتحدثين الرسميين ..
_ وبيخلِّيهم شغالين في جو هادئ ورايق بعيد من الضغط ..
◼️ الخطاب ده يكون قائم بنفس دور ( الشارع ) المحروم من ( الكلام والهتاف ) في ( المواكب ) و ( المظاهرات ) .
◼️ الخطاب ده بكون ( ضهر ) و ( كتف ) و ( حيل ) و ( ضراء ) و ( ملاذ آمن ) للخطاب الرسمي ..
_ بتتكسر كل خطابات ( الأعداء ) في مساحته قبل ما تصل لعناصر ( الخطاب الرسمي ) ..
◼️ والدور ده عندو نتائج ملموسة ظاهرة في شكل الإنجازات الكبيرة لتحالف صمود في ( العمل السياسي والدبلوماسي ) بالرغم من ( حرمانهم من الجوازات ) ..
◼️ والإنجازات دي ظاهرة في وجود كل نقاط ( الرؤية السياسية لصمود ) في حلول ( المجتمع الإقليمي والدولي ) .
🛑 إنت قبلان تكون في المساحة دي ؟
◼️ أيوه قبلاني للآتي :
♦️1/ أنا ما ببحث عن انجاز خاص ، ولا عن مستقبل سياسي ، أنا بقوم بدوري ومهامي وواجباتي في حدود المساهمة مع الآخرين في إنجاز المُتفق عليه .
♦️2/ مبسوط جداً باني كنت ولازلت ( درقة ) من ( الدرقات ) الاتكسّرت عندها كتير من ( السهام ) الكانت مصوبة تجاه الآخرين .
♦️ 3/ العمر ده بسيط ، وأيام معدودة ، والنجاح فيهو مافي إنك تكون صورة من آخرين ، النجاح في إنك تملأ الفراغات الموجودة بين تماسك المجموعة ، وتضع بصمتك الخاصة وتقوم بدورك ومهامك في العمل لأجل إنتصار ( الفريق ) والمهم ترضي ( عقلك وقلبك وضميرك ) قبل ما تفكر في إرضاء ( الآخرين ) .
♦️4/ لما تقول لي الدور ده ما بشبهك ، كل واحد فينا حا يقول كده ، وحا نربّع يدْينا وننتظر الزول البشبه الدور ده وصدقني ما حا يجي ، الفرق البيني وبينك أنا عندي قدرة ( أملأ الفراغ ) لحدي ما ( يجي ) سيدو .. ولو ماجاء حا أواصل لإيماني التام ( بأن الطبيعة لا تؤمن بالفراغ )
◼️ وياريت ردي ده يكون واضح ليك وللآخرين ..
◼️ ومع السلامة ..
#المرياع_ماينوم
#لإقتلاع
#إرادة_الحركة_الجماهيرية_هي_الحل🇸🇩✌🏻
[ad_2]
Source
