[ad_1]
“٢٢ اغسطس ٢٠٢٣ كان تاريخ سقوط المدرعات لمدة ٤٥ دقيقة ”
ومع شروق شمس ٢٢ كنا قد اعددنا العدة من ليلتها وزخرنا دوشكاتتا وقرنوفاتنا ونحن نشاهد رمم الامس تأكلهم الكلاب الضاله واعددنا القهوة وقاعدين نكشف _ما محتاجه منظار _ اصلا كانت الرمم تحتنا مرميه ومحتفلين بالتهليل والتكبير وتبشير الناس بيوم ٢١ يوم الانتصار ودحر العدو ..
وفجأة دون وجود هجوم ولا واحد نطق اللاسلكي تعليمات بالانسحاب لان المواجهة الغربية للمدرعات سقطت، مع العلم ان قوتي ٧ مجاهدين وملازم اول حسن..
ورددت باللاسلكي لا يوجد هجوم من هذا الاتجاه ومسيطرين سيطرة كاملة علي المواجهة بعد يوم مضني..
وفصل اللاسلكي وانقطع التواصل واصبح الكل في حيرة..!!!!
الكلام ده في تمام الساعة ٨ ص..
وبعدها شاهدت من اعلي نقطة كل القوات انسحبت الي الزخيرة والدبابات تتسابق في الانسحاب وما عارف انت منسحب الزخيرة ليه يعني تتحاصر اكتر وتسقط المدرعات بعد كل الدماء التي بزلناها!!!!؟
وانسحبت نقطة البراء و 04 وجو علينا وقالو ننسحب انصياعاً للتعليمات..
ورفضت وقلت بأعلي صوت واهلنا الفي اللاماب ديل واولادنا المستنفرين الما عارفين في شنو لان جاني واحد قال لي في شنو اللاسلكي فاصل وجوه الفي اللاماب ما عارفين في شنو والاسر الصنددت وقاعدة معانا انتوا بتهظروا ولا شنو؟
وحينها صاح احدهم يا عثمان ما تعمل رأي عام وانسحب..
كبست ليه بركاوي وقلت ليه داك الشارع يلا انسحب نحنا من هنا شبر ما مارقين..
واصبحنا نراقب ونشاهد وبدأ دخول المتمردين من الجهة الشرقية وبعد التركيز الناس دي خاشه من غير تسليح وظاهر عليهم شفع سعاليك ساي لدرجة الواحد بكون جاري وخاشي علي المدرعات وماسك البنطلون بيدينو الاتنين!!!
وتقديراً للموقف رسلنا بعض الشباب لسحب المواطنيين الفي اللاماب الي الشجرة وبعد اتاكدنا من تراجع الكل قررنا التراجع لاننا بقينا نص الصندوق ولسه الوقت داك تتدفق جماعات التمرد الي داخل المدرعات وتمت السيطرة عليها تماماً وسقطت.. في تمام الساعة ال ١٠ ص..
تركنا نقطتنا 04 بعد وضع فدائي واحد قال انا بفيدكم وانتوا امشوا شوفوا في شنو.. ✊
وتراجعنا حتي مركز صحي الشحرة الركن الجنوبي الغربي للمدرعات..
وشاهدنا ما يشيب الراس جيش عرمرم اوله في بوابة الزخيرة واخره عند سوق الشجرة ولكن لا يتجهون علي المدرعات بل منسحبين منها!!!
وما عارفين اننا يوم حصة الانسحاب دي كان عندنا طهور وكنا غايبين..
وبعدها اها يا ناس نخش ولا ننسحب مع الناس دي ونص النقاش من امام عاشوراء ظهر المقدم المقدام x اها يا سعاتك الحاصل شنو، حسمنا وقال انتوا عايزين شنو قلنا ليه داخلين قال عددكم كم قلت ليه دقائق..
ووقفت وناديت من اراد الدخول الي المدرعات يجي بجاي الما داخل الزخيره طوالي نحنا لو لقينا زول في ضهرنا حا نعتبرو عدو
وكانت القوة
احمد حسب الله، الشهيد حسن بدر الدين،الشهيد صالح، الروسي، مهند محمد احمد واخوهو، ربيع علي، الشيخ ابو كلام، عبدالرحيم، واتنين من قوة اولاد الجزيرة، و٤ من اولاد الرميلة و٢ اولاد ابو طيره من اولاد اللاماب، والعفو اذا نسيت زول..
وبدأت المعركة باستشهاد اخو مهند محمد احمد واصيب مهند والروسي بالقناصات..
وواصلنا ولم نسعف مصاب ولم نخلي شهيد وبدأت زخات المطر وعندها علمت بأن النصر حليفنا وقدامنا المقدم المقدام..
عشان تتخيل المنظر المطرة بتقيف لكن لما تعاين في المويه نفس شكل قطرات المويه النازله من السماء زخيره من العدو وقسماً بمن رفع السماء زول دنقر ساي ماف ولا ساتر ولا ارقد ولا غيرو متقدمين رافعي الرؤوس شامخين..
احمد حسب الله ده ماشي قدامي الا اشوف ليك الكورنيت جااااي يلفلف يا احمد كورنيت كورنيت احمد ده دنقر كده بس الكورنيت عده منو دنقر وهو ماشي ما رقد ولا جري، الكورنيت عدا واحمد مواصل 😅..
الشيخ جاني قال لي اسمع دي وصيتي وفيها ديوني 😅 ،قلت ليه انا زاتي عايز ارسل وصيتي يعني انا مصفخ ارح يا مان…
الكلام ده والناس ماشه والزخيره مطر
ووتقدمنا وبدأنا الاشتباك مع العدو من المسافة ماف لقينا القوة الاولي ماشه علي مخازن السلاح!!! متكناهم متكا مبرحاً..
تصدق وتآمن بالله وصلنا مرحلة بندقهم جوز بتاعة الكورة ديك، ما بتصدقو الكلام ده…
خشينا لحدي الجنزير وكان مقر المجاهدين في جملون كبير فيه دبابات متعطلة خشينا مع الملف كده لقيناهم ليك بتصورو هاااذي دباباتهم هاذي دباباتهم، لما خاشين وشهم في وشنا وقفت ومعاي اولاد ابو طيره بقينا نعاين فيهم ويعاينو فينا زي ٥ او ٦ ثواني فاهديناهم رمان والباقين دورنا بنية معاهم قسماً بالله..
لسه يتبع…
[ad_2]
Source
