[ad_1]
🛑 ضحايا مركز تأشير – بورتسودان
◼️ المشكلة دي بدأت من شهر 4 الفات ..
تفاصيلها كالآتي :
◼️ الأُسر السودانية المسافرة إلى ( السعودية ) بتمشي ( الوكالات ) في بورتسودان عشان الوكالات تعمل ليها الآتي :
📌 _ الإدخال للبيانات
📌 _ التأمين
📌 _ طلب الإنجاز .
◼️ بعد الخطوة دي بجي ( مركز تأشير ) كوسيط بين ( الوكالات ) و ( السفارة السعودية ) ..
مركز تأشير بيعمل للأُسر الآتي :
📌 _ البصمة
📌 _ تشيل الجواز
📌 _ تمشي السفارة السعودية في بورتسودان
◼️ الحصل :
الأُسر السودانية بتمشي تدفع عن الطريق ( الوكالات ) عشان تعمل ليها : الإدخال للبيانات والتأمين وطلب الإنجاز .
◼️ بتدفع موعد البصمة مبلغ يصل إلى ( 110 ريال سعودي ) وبجيك اشعار البنك عشان تمشي تعمل بيهو حجز لموعد البصمة .
◼️ الوكالة بتحدّّد سعر انجاز الجواز بمبلغ ( بدون تفاصيل ) ويصل المبلغ بمافيه ( مواعيد البصمة ) إلى ( 920 ريال سعودي ) للجواز الواحد .
◼️ لك أن تتخيّل عزيزي القارئ المبلغ الذي ستدفعه الأسرة الواحدة المكوّنة من عدد ( 7 إلى 10 أفراد ) ..!!
🛑 مواعيد البصمة :
_ مركز تأشير عندهم ( مكتب ) ..
_ المكتب فيهو ( موظفين )
_ الموظفين ( يراجعوا ورقك )
_ إذا فيهو حاجة ناقصة يطالبوك تكمِّلها .
_ اذا في حاجة غلط ينبِّهوك ليها ..
_ اذا ورقك سليم بقولوا ليك : أدخل البصمة .
◼️ وبعد كده بقولوا ليك تعال بعد اسبوع استلم الجواز .
🛑 الجواز بنزل وين :
◼️ بنزل في منصة التأشيرات السعودية وانت بدورك كمقدِّم تتابع المنصة عبر ( رابط انترنت ) ..
◼️ تدخِّل ( رقم جوازك ) وتعرف الحاصل فيهو
◼️ إذا جوازك داخل القنصلية السعودية ( بيتحرّك وتاريخ الطلب بتغيّر ) كده معناها السفارة ( قبلت جوازك ) .
◼️ الجوازات البتترفض :
معناها ما ( دخلت القنصلية ) ولا حصلت فيها ( حركة في المنصة ) و ( لا اتغيّر تاريخها ) .
◼️ الجوازات البتتقبل :
معناها ( دخلت القنصلية ) وحصلت فيها ( حركة في المنصة ) و ( اتغيّر تاريخها ) .
◼️فب كلا الحالتين :
بيقولوا ليك تعال بعد اسبوع استلم جوازك ..
◼️ تمشي تستلم جوازك في ظل ظروف مزرية جداً في بورتسودان :
_ مافي ضل
_ مافي زول بديك معلومات مؤكدة .
_ تستلم ظرفك مقفول وتطلع
_ تفتحو تلقاهو ( مؤشّر ) أو ( ما مؤشّر )
إذا لقيتو ( ما مؤشَّر ) ما بتلقى إجابة توضِّح السبب .
_ بقولوا ليك : أمشي للوكالة بتاعتك تشرح ليك .
◼️ تمشي الوكالة :
بقولوا ليك نحنا ماعملنا حاجة غلط
السستم ما كان موفِّر خيار غير 365 يوم خيار إنجاز للوكيل .
مع العلم بإنو :
📌 السعودية ماكانت موقِّفة الزيارات المتعدّدة وهي مدتها 365 يوم .
📌 المستندات كانت بتطلع منهم بمدة 365يوم أو 90 يوم لسفرة واحدة ..
📌 في التحديث الجديد المستند بقى يجي ( مصفَّر ) يعني مافيهو مدة محدّدة ..
📌 بجي مكتوب فيه الآتي : يتم تحديد مدة الزيارة وعدد السفرات عند مقابلة القنصلية السعودية في بورتسودان ودي خطوة بتتم عبر ( مركز تأشير ) .
____
◼️ أُسر كتيرة في ( ظل الجوطة دي ) استلمت جوازاتها الراجعة بدون تأشيرة وقبلها في أُسر برضو بشهور جوازاتها بدون تأشيرة .
◼️ بتلقى : أُسر أول مرة تسافر زيارات
◼️ وبتلقى زولة أولادها في السعودية وهي جات زيارة .
◼️ بتلقى : أسره فيها جزء جوازتهم ( إتأشّرت ) والجزء التاني جوازتهم ( رجعت ) .
🛑 والوكالات بتقترح على جميع الأُسر :
◼️ إنها تعمل عملية إنجاز جديد ( يعني تاني تبدأ تدفع من البداية )
◼️ في وكالات : بتشيل في عملية الإنجاز الجديدة دي ( المبلغ كامل ) .
◼️ وفي وكالات : بتجامل وتشيل جزء من المبلغ .
🛑 وبعد تعمل طلب الإنجاز : ممكن تاني الطلب يترفض ..
◼️ في أُسر دفعت في عمليات الإنجاز دي ( مرتين وتلاتة ) بدون فائدة .
◼️ وكلما تدفع ما بتلقى سبب واحد ( لمعيار الرفض ) ومافي ( حل واضح ) إنت تستند عليهو .
🛑 المشكلة الأُسر دي كلها ما من بورتسودان ، قاعدة في ظروف صعبة جداً :
_ إيجارات غالية .
_ وغلاء في المعيشة .
_ وما معروف الوضع ده حا يستمر لمتين .
_ في أُسر قاعدة في الوضع ده من ( شهر 4 الفات ) .
🛑 والمؤسف في عمليات دفع بتتم ( تحت التربيزة ) عشان ( تحل مشكلة تأشيرة جوازاتها ) .
_ بيقترح ليك بعض أفراد الوكالات لو عاوز أمورك تمشي في موظّف في مركز تأشير ممكن ينجز ليك الموضوع ده لكن تدفع .
_ وعملية الدفع بتتفاوت من ( 500 ريال ) إلى ( ألف ريال ) !!
_ والموظّف الحاينجز ليك المهمة دي ما بيظهر في الصورة ..
🛑 الوقفة الإحتجاجية :
في ظل الوضع المعقّد والصعب ده قرّرت الأسر المتضررة إنها تعمل ( وقفة إحتجاجية ) أمام ( السفارة السعودية في بورتسودان ) على أساس مقابلة ( القنصل ) أو ( نائب القنصل ) .. لمطالبتهما بالتدخُّل لحل مشكلة الجوازات الاترفضت تأشيرتها ..
◼️ وقفت الأسر في الشمس ، ورفعت لافتات مطالباتها .
◼️ اقترح عليهم واحد من أفراد الوكالات الموجود داخل الوقفة مقابلة : عادل المفتي ( مدير مركز تأشير ) .
◼️ اتحركّت الأُسر من ( الوقفة الإحتجاجية ) إلى ( مكتب عادل المفتي ) ..
◼️ عند وصول وفد من الوقفة الإحتجاجية إلى ( مكتب عادل المفتي ) ما قصّر لغى ليهم إجتماع عشان يقابل الوفد .
◼️ر أول من الوفد دخل قاليهم ( الناس الواقفين بره ورافعين لافتات ديل تبعكم ) ؟ قالوا ليهو : نعم
◼️ قال ليهم : خلاص أدوني مهلة ( 48 ساعة ) أنا بحل ليكم المشكلة مع ( القنصل السعودي ) .
🛑 نهاية المدة :
مدة ال 48 ساعة دي بتنتهي باكر ( الضُهُر ) .
◼️ وجميع الأُسر المتضرّرة في بورتسودان منتظره ( نهاية المدة ) عشان تعرف ( مصيرها ) ..
_ يا إما : ( انتهت المشكلة )
_ يا إما : يختاروا الخيار الأخير وهو ( لابد من مقابلة مسؤولي القنصلية السعودية لحل المشكلة ) ..
#المرياع_ماينوم
#لإقتلاع
#إرادة_الحركة_الجماهيرية_هي_الحل🇸🇩✌🏻
[ad_2]
Source
